KXDR qoşunları Rusiyaya kömək edir - NATO təsdiq edib

Rütte bildirib  ki, səhər Cənubi Koreya nümayəndə heyəti NATO, həmçinin Yaponiya, Avstraliya və Yeni Zelandiyanı Şimali Koreya hərbçilərinin Rusiyada olduğu və onların müharibədə iştirak etdikləri barədə məlumatlandırıb.

"Bu gün mən təsdiqləyə bilərəm ki, Şimali Koreya hərbçiləri Rusiyaya göndərilib və şimali koreyalı bölmələr Kursk vilayətində yerləşdirilib... Bu, KXDR-in Rusiyanın qanunsuz müharibəsinə davamlı şəkildə cəlb olunmasında əhəmiyyətli bir eskalasiyadır. Bu, həmçinin BMT Təhlükəsizlik Şurasının Qətnaməsinin daha bir pozuntusudur. Üçüncüsü, bu, Rusiya müharibəsinin təhlükəli genişlənməsidir," – Rütte bildirib.

"NATO Rusiyanı və KXDR-i dərhal bu hərəkətləri dayandırmağa çağırır. Rusiya ilə Şimali Koreya arasında hərbi əməkdaşlığın dərinləşməsi həm Sakit okean, həm də Avroatlantik təhlükəsizliyə təhdiddir," –  baş katib əlavə edib.

O, KXDR-in əvvəllər Rusiyaya döyüş sursatı və ballistik raketlər təqdim etdiyini xatırladıb. "Buna qarşılıq olaraq, (Rusiya Prezidenti Vladimir) Putin Şimali Koreyaya beynəlxalq sanksiyalardan yan keçmək üçün hərbi texnologiya və digər dəstək verir," – Rütte qeyd edib.

O vurğulayıb ki, bu şəraitdə demokratik dünyanın birgə dəyərləri müdafiə etmək üçün səylərini birləşdirməsi vacibdir.

"Eyni zamanda, Şimali Koreya hərbçilərinin Kursk vilayətində iştirakı Putinin artan ümidsizliyinin bir əlamətidir. Putinin müharibəsində 600-dən çox Rusiya hərbçisi həlak olub və ya yaralanıb və o, Ukraynaya hücumu xaricdən dəstək olmadan davam etdirə bilmir... NATO müttəfiqləri azad və müstəqil Ukraynanı dəstəkləməyə davam edəcək, çünki Ukraynanın təhlükəsizliyi bizim təhlükəsizliyimizdir," – Mark Rütte bildirib.

Rütte əlavə edib ki, bazar ertəsi gününün sonlarında bu hadisələr kontekstində Cənubi Koreya Prezidenti Yun Sok Yel və Ukraynanın müdafiə naziri Rustem Umerovla danışacaq.