Milli ödəniş sistemi vasitəsilə emal edilən əməliyyatların dövriyyəsi 3,6 dəfə artıb
03.12.2024 10:43
Son 3 ildə Azərbaycanda milli ödəniş sistemi infrastrukturu, yəni AZİPS, XÖHKS və AÖS üzərindən emal
edilən ödəniş əməliyyatlarının ümumi dövriyyəsi 3,6 dəfə artaraq cari ilin ilk
10 ayında 606 miyard manat təşkil edib. Cari ildə ödəniş kartları ilə ölkə
daxilində aparılan ödəniş əməliyyatlarının 63.8%-i nağdsız formada həyata
keçirilib. Bunu Azərbaycan Bank Assisoasiyasının rəhbəri Zakir Nuriyev YIII Beynəlxalq Bankşılıq Forumunda bildirib.
"Həyata keçirilən islahatlar çərçivəsində Ani Ödənişlər Sisteminin infrastruktur imkanlarının təkmilləşdirilməsi, açıq bankçılıq üzrə platformanın formalaşdırılması, sandbox rejiminin tətbiqi ilə innovativ həllərinin tətbiqinin genişləndirilməsi istiqamətində fəaliyyət diqqəti cəlb edir.
Növbəti strateji dövrdə rəqəmsal ödəniş ekosistemin qabaqcıl beynəlxalq təcrübə əsasında daha da inkişaf etdirilməsi məqsədilə lokal ödəniş kartlarının emissiyası məsələsi daha geniş çərçivədə müzakirə edilərək mövcud imkanlar və gələcək perspektivlər qiymətləndirilməlidir. Hesab edirik ki, lokal ödəniş kartlarının emissiyası ekosistemdə rəqabəti daha da təşviq etməklə xidmət haqlarının effektiv formada tənzimlənməsinə, uzunmüddətli perspektivdə infrastrukturun davamlılığının daha da artırılmasına imkan verəcəkdir", - Nuriyev bildirib.
Onun sözlərinə görə, ödəniş
xidmətləri və ödəniş sistemləri sahəsində qnaunvericilik bazası beynəlxalq təcrübəyə
uyğun qurulduqdan sonra Azərbaycanda 14 elektron pul təşkilatı, 8 ödəniş təşkilatı və bir ödəniş
sistemi operatorunun fəaliyyəti lisenziyalaşdırılıb.
Bununla belə Nuriyev bildirib ki, rəqəmsal
transformasiya sahəsində aparılan islahatların davamı olaraq məsafədən bank
hesablarının açılması proseduruna yenidən baxılmalı və günün tələblərinə uyğun
təkmilləşdrilməlidir.
"Maliyyə inkluzivliyinin inkişafında açar rolunu oynayan
bank hesablarının açılması zamanı eyniləşdirmə tələblərinin tətbiqində pilləli
yanaşmanı daha da dərinləşdirərək mövcud proseslər sadələşdirilməlidir. Maliyyə
bazarlarında innovativ həllərin tətbiqi prosesinin daha da sürətləndirilməsi
üçün bu layihələrin təhlili, planlaşdırılması və realizasiyaya hazırlanması məqsədilə
innovasiya hub-ın yaradılması diqqət mərkəzində saxlanılmalıdır", - o əlavə edib.
Onun sözlərinə görə, ödəniş
kartları bazarının inkişafı və əlverişli tarif siyasətinin tətbiqi məqsədilə yerli
və xarici ödəniş sistemi operatorlarının mövcud tarif siyasəti təhlil edilməli,
mümkün ola biləcək sui-istifadə halları və bazara mənfi təsir effektləri məhdudlaşdırılmalıdır.
Azərbaycan Respublikası Mərkəzi Bankı tərəfindən innovasiya mərkəzinin yaradılıb ki, bu da maliyyə bazarlarında real tətbiq ediləcək layihələrin reallaşdırılmasını asanlaşdırmalıdır.
N.Təbrizli
www.anews.az
Foto 
Video 
