Bu il Rusiyaya gedən miqrantların rəqəmsal profilləri yaradılacaq

Rusiyaya daxil olan miqrantların statusuna nəzarəti asanlaşdırmaq üçün 30 iyun 2025-ci il tarixindən etibarən şəxsi və biometrik məlumatlarından ibarət rəqəmsal profil formalaşdırılacaq.

"Report” xəbər verir ki, iyunun 30-dan etibarən istənilən buraxılış məntəqəsindən Rusiyaya daxil olan xarici vətəndaşlar barmaq izlərini və fotoşəkillərini təqdim etməli olacaqlar. Bu məlumat həm də rəqəmsal profilin əsasını təşkil edəcək.

Rusiya Rəqəmsal İnkişaf Nazirliyinin verdiyi məlumata görə, əcnəbilər istədikləri təqdirdə özləri - RuID tətbiqində rəqəmsal profil yarada biləcəklər. Bu, eksperiment çərçivəsində hazırlanacaq əcnəbilər üçün dövlət xidmətlərinin analoqudur.

Profildə Rusiyaya səfəriniz barədə məlumat verə və ölkədə xidmətlər ala bilərsiniz, məsələn, tibbi sığorta üçün müraciət edə və ya Daxili İşlər Nazirliyində qeydiyyatdan keçə bilərsiniz.

Dəyişikliklər Belarus vətəndaşlarına, altı yaşına çatmamış uşaqlara, xarici dövlətlərin Rusiyadakı diplomatik nümayəndəliklərinin və konsulluq idarələrinin diplomatlarına və əməkdaşlarına, habelə onların ailə üzvlərinə, beynəlxalq təşkilatların və onların Rusiya Federasiyasında akkreditə olunmuş nümayəndəliklərinin əməkdaşlarına və onların ailə üzvləri şamil edilməyəcək.