OMV rəhbəri Azərbaycan qazının Ukrayna vasitəsilə tranzitini dəstəkləyib

Avropa qaz tədarükünə ehtiyac duyur və Azərbaycan qazının Ukrayna ərazisi vasitəsilə tranzit perspektivlərini istisna edə bilməz. Bu barədə Avstriyanın OMV neft-qaz konserninin rəhbəri Alfred Ştern Neue Zürcher Zeitung qəzetinə müsahibəsində bildirib.

"Biz bütün enerji daşıyıcılarının, o cümlədən qazın tədarükünü artırmalıyıq. Və biz özümüzə hansısa variantı istisna etmək lüksünü verə bilmərik. Mən gələcəkdə özümü tək bir tədarükçünün əlinə buraxmazdım. Qalan məsələlər isə siyasi xarakter daşıyır”, –  OMV rəhbəri Azərbaycan qazının Ukrayna ərazisi vasitəsilə tranzitini dəstəkləyib-dəstəkləməməsi ilə bağlı suala cavab verib.

Yanvarın 1-də Rusiya qazının Ukrayna üzərindən Avropaya tranziti tamamilə dayandırılıb. Buna səbəb Kiyevin tranzit sazişini uzatmamaq qərarı olub.

Sonradan Reuters agentliyi xəbər verib ki, Avropa Komissiyası Ukrayna ərazisindən Avropaya qaz tədarükü ilə bağlı Kiyevlə danışıqları davam etdirəcək və bu prosesə Macarıstan və Slovakiyanı da daxil etmək planlaşdırılır.

 Slovakiyanın xarici və Avropa işləri naziri Yuray Blanar bəyan edib ki, bu danışıqların mövzusu Azərbaycan qazının Aİ-yə tranziti ola bilər.

N.Təbrizli