Bu adamlara "ekspert" adını kim verib? - DİM sədrindən apelyasiya şikayətləri ilə bağlı açıqlama

2026-cı ildən etibarən apelyasiya müraciətlərində əsaslandırma tələb olunacaq. Bunu Dövlət İmtahan Mərkəzinin İdarə Heyətinin sədri Məleykə Abbaszadə  deyib.

“Apelyasiyalar üzrə maraqlı faktlardan biri də 85 telefon nömrəsinə gələn 10-dan artıq cavab məktubudur. Belə halların bir çoxu xidmət adı altında fəaliyyət göstərən şəxslərin təşkil etdiyi sistemli müraciətlərlə bağlıdır. Bəzi şəxslər özlərini “təhsil eksperti” kimi təqdim edərək valideyn və abituriyentlərə “apelyasiya yazıram, nəticəni dəyişirəm” vədləri verirlər. Mən bilmirəm kim bu adamlara ‘ekspert’ adı verib. Hansı ali məktəbdə dərs deyiblər? Hansı məqalələri yazıblar? Hansı beynəlxalq konfranslarda çıxış ediblər?” – deyə o bildirib.

Abbaszadə əlavə edib ki, növbəti ildən etibarən apelyasiya prosesinə qanuni və əsaslandırılmış yanaşma tələb ediləcək. 

“Bu o deməkdir ki, “təkrar qiymətləndirin” kimi qeyri-dəqiq şikayətlərə resurs ayrılmayacaq. Həmçinin, rəsmi cavablar yalnız ərizədə qeyd olunan əlaqə vasitələrinə göndəriləcək”, Abbaszadə mayın 23-də qəbul imtahanlarının başlanması ilə əlaqədar keçirilən mətbuat konfransı zamanı bildirib.

Aytac Zeynalova