Rusiya üçün sülh sazişi son şansdır -ABŞ

Ukrayna ilə bağlı təklif olunan saziş Rusiya üçün mümkün olan ən yaxşı imkandır. Bunu ABŞ-ın BMT-dəki səfiri Con Kelli bildirib.

Kelli Moskvanı sazişi qəbul etməyə çağırıb.

“Əgər Rusiya yanlış qərar verərsə və bu fəlakətli müharibəni davam etdirərsə, ABŞ sülh danışıqlarında iştirakını yenidən nəzərdən keçirməyə məcbur olacaq”, — o bildirib və əlavə edib ki, Rusiyaya qarşı əlavə sanksiyalar hələ də gündəlikdədir.

Daha əvvəl Rusiyanın BMT-dəki daimi nümayəndəsi Vasili Nebenzya Ukrayna prezidenti Vladimir Zelenski və onun tərəfdarlarını keçmiş ABŞ prezidenti Donald Trampı “aldatmaq və çaşdırmaq” cəhdində ittiham edib.

Nebenzya bildirib ki, “heç bir yeni anti-Rusiya sanksiyası Zelenski rejiminin məğlubiyyətinin qarşısını ala bilməyəcək” və əlavə edib ki, Moskva Kiyev münaqişəni uzatdığı və mülki infrastruktur obyektlərinə zərbələr endirdiyi müddətdə müharibəni davam etdirəcək.

Rusiya bu gecə  Odesa vilayətinə kütləvi hücum zamanı yeni qanadlı raketlər və pilotsuz uçuş aparatları tətbiq edib. Bunu Ukrayna monitorinq resursları bildirib.

Məlumata görə, "Şahed" dronları ilə yanaşı, yüksək partlayıcı-fraqmentasyon döyüş başlığına malik ən yeni "Banderol" qanadlı raketi də istifadə edilib. Ukrayna rəsmiləri əvvəllər bu raketin "İnoxodets" PUA-larından və gələcəkdə Mi-28N "Gecə ovçusu" döyüş helikopterlərindən buraxıla biləcəyini bildiriblər.

Raketin uçuş sürətinin 600 km/saat, uçuş məsafəsinin isə 500 kilometrə qədər olduğu qeyd olunur.

N.Təbrizli