Aşurada bu ünvanlarda qan vermək mümkün olacaq

Qafqaz Müsəlmanları İdarəsi (QMİ) bu il Aşura günü – iyulun 5-də təşkil olunacaq ənənəvi qanvermə aksiyasının keçiriləcəyi məkanların siyahısını açıqlayıb. Siyahı QMİ-nin rəsmi internet səhifəsində dərc olunub.

Aksiya Bakının müxtəlif məscid və ziyarətgahlarında — o cümlədən “Təzə Pir”, “Əjdərbəy”, “Bibiheybət” və “Mir Mövsüm Ağa” kimi ibadət yerlərində həyata keçiriləcək. Paytaxtla yanaşı, Gəncə, Sumqayıt, Şuşa, Ağdam, Mingəçevir, Lənkəran, Şəki və digər şəhərlərdə də qanvermə məntəqələri fəaliyyət göstərəcək.

Naxçıvan Muxtar Respublikasında isə qanvermə aksiyası 14 fərqli məkan — məscidlər və tibb müəssisələrində baş tutacaq.

QMİ hər il Aşura günü insanları qanvermə kimi xeyirxah və humanist bir addıma təşviq etməklə İmam Hüseynin (ə) əziz xatirəsini yaşatmağı və bu günü sağlam cəmiyyətin qurulmasına xidmət edən əməllərlə yad etməyi tövsiyə edir.