“Bakı Beynəlxalq Dəniz Ticarət Limanı” MMC-yə çevrilib

"Azərbaycan Dəmir Yolları" QSC-nin (ADY) tərkibinə daxil edilən "Bakı Beynəlxalq Dəniz Ticarət Limanı" QSC yenidən təşkil edilərək “Bakı Beynəlxalq Dəniz Limanı” MMC-yə çevrilib. Şirkətə Elnur Salahov baş direktor təyin olunub. Bu barədə məlumatı ADY yayıb.

Salahov 1997-ci ildə Azərbaycan Dövlət İqtisad İnstitutunda maliyyə ixtisası üzrə təhsil alıb, 2014-cü ildə iqtisad üzrə fəlsəfə doktoru elmi dərəcəsini əldə edib.

O, karyerası ərzində BMT-nin İnkişaf Proqramı, İqtisadi İnkişaf Nazirliyi, Təhsil Nazirliyi yanında Peşə Təhsili üzrə Dövlət Agentliyi və Dövlət Şəhərsalma və Arxitektura Komitəsində müxtəlif rəhbər vəzifələrdə çalışıb.

O cümlədən, Bakının 2020–2040-cı illər üzrə Baş planı və işğaldan azad olunmuş ərazilərin baş planlarının hazırlanmasında iştirak edib. 

Salahov ADY-də fəaliyyətə 2024-cü ilin sentyabrında başlayıb və Beynəlxalq əlaqələr departamentinə rəhbərlik edib. 

Prezident İlham Əliyevin 25 fevral 2025-ci il tarixli sərəncamına əsasən, Bakı Limanı ADY-yə qoşulmaqla yenidən təşkil olunub. Yenidənqurmanın məqsədi dəmir yolu və dəniz nəqliyyatı sahəsində əməliyyatların daha səmərəli və əlaqəli şəkildə idarə olunmasıdır.

Gülnar