Gürcüstanda uranı $3 milyon satmaq istəyən iki nəfər saxlanılıb

Gürcüstan Dövlət Təhlükəsizlik Xidməti (SSS) Batumi şəhərində keçirilən əməliyyat nəticəsində uranı qanunsuz şəkildə 3 milyon ABŞ dollarına satmaq istəyən Gürcüstan və xarici ölkə vətəndaşını saxlayıb.

Təhlükəsizlik Xidmətinin məlumatına görə, saxlanılan şəxslər Dövlət Təhlükəsizlik Xidmətinin Kontr-kəşfiyyat və Xüsusi Əməliyyatlar departamentlərinin birgə keçirdiyi tədbir nəticəsində ələ keçirilib.

Müsadirə olunan nüvə materialının radioaktiv kimyəvi element — uran olduğu bildirilib.

Rəsmi məlumata görə, bu maddə alfa və qamma şüalanma qabiliyyətinə malikdir və partlayıcı qurğuların hazırlanmasında və ya kütləvi insan tələfatı ilə nəticələnə biləcək terror aktlarının törədilməsində istifadə oluna bilər.

Cinayət işi Gürcüstan Cinayət Məcəlləsinin 230-cu maddəsi ilə araşdırılır. Bu maddə 5 ildən 10 ilədək həbs cəzası nəzərdə tutur.

N.Təbrizli