SOCAR-KBR BP ilə Azərbaycanda iki enerji layihəsi üzrə müqavilə imzalayıb

Azərbaycan Dövlət Neft Şirkəti (SOCAR) və ABŞ-ın KBR şirkətinin birgə müəssisəsi olan SOCAR-KBR, BP ilə Azərbaycanda iki iri enerji layihəsi üzrə müqavilə imzalayıb.

KBR-nin məlumatına görə, razılaşmalar “Səngəçal terminalının elektrikləşdirilməsi” (STEL) və “Şahdəniz Compression” (SDC) layihələrini əhatə edir. Müqavilələrə əsasən, SOCAR-KBR hər iki layihə üzrə mühəndis layihələndirmə və satınalma xidmətləri göstərəcək.

Layihələrin maliyyə dəyəri açıqlanmayıb. İşlərə əsasən SOCAR-KBR rəhbərlik edəcək və həm yerli mütəxəssislər, həm də KBR-in beynəlxalq komandası prosesə cəlb olunacaq.

STEL layihəsinin tikintisinə bu il başlanacağı və 230 milyon dollar dəyərində olacağı gözlənilir. Layihənin birinci mərhələsi 2027-ci ilin ortalarında, ikinci mərhələsi isə 2028-ci ilin sonunadək tamamlanacaq.

2,9 milyard dollar dəyərində olan SDC kompressor platformasının tikintisinə 2025-ci ildə start veriləcək, istifadəyə isə 2029-cu ildə verilməsi planlaşdırılır. Layihə əlavə 50 milyard kubmetr qaz və 25 milyon barel kondensat hasilatını nəzərdə tutur.

N.Təbrizli