Anglo Asian Mining Qarabağda Demirli mis yatağında filiz hasilatına başlayıb

Böyük Britaniyanın Anglo Asian Mining Plc. şirkəti Azərbaycanın Qarabağ iqtisadi rayonunda yerləşən Demirli mis yatağında ilk filiz hasilatına başladığını açıqlayıb.

“Anglo Asian Mining plc Demirli mis yatağının istismara verilməsi və ilk filiz hasilatının başladığını elan edir. Hazırda istismar mərhələsi davam edir və hasilatın ilin sonuna qədər tədricən artırılması gözlənilir,” — şirkətin məlumatında deyilir.

Şirkət 2025-ci ildə təxminən 4 min ton mis konsentratı istehsal etməyi, 2026-cı ildən isə illik istehsalın 15 min tona çatdırılacağını proqnozlaşdırır. Yatağın istismar müddəti geoloji və mineral resurs modellərinin dəqiqləşdirilməsindən sonra müəyyən ediləcək.

Filiz açıq karxanada hasil olunur və avtomobil nəqliyyatı ilə emal zavoduna daşınır. Zavod ölkənin milli enerji sistemi ilə təmin olunur, su isə yerli və regional mənbələrdən alınır.

Hazırda emal tullantıları mövcud bərk tullantı anbarına yönləndirilir. Yeni anbar üçün geotexniki tədqiqatlar və bəndin, eləcə də boru xətti marşrutunun layihələndirilməsi başa çatıb.

Layihənin icrası üçün 150-yə yaxın yeni işçi işə götürülüb, təcrübəli 50 nəfər isə şirkətin digər obyektlərindən köçürülüb.

Şirkət Demirli yatağının əlavə resurs potensialına malik olduğunu, mövcud karxananın genişləndirilmə imkanlarının və ətraf ərazilərdə yeni hədəflərin müəyyən edildiyini bildirib. Yaxın zamanda genişmiqyaslı regional geoloji kəşfiyyat proqramı başlayacaq.

Təsdiqlənməmiş 2016-cı il məlumatlarına əsasən, Demirli yatağında təxminən 275 min ton mis və 3,200 ton molibden ehtiyatı mövcuddur.

Anglo Asian Mining Azərbaycanda Gədəbək və Qoşa yataqlarında da fəaliyyət göstərir. Şirkət Azərbaycan dövləti ilə 1997-ci ildə imzaladığı PSA müqaviləsi çərçivəsində 8 yatağın işlənməsi hüququna malikdir. Müqaviləyə görə, Azərbaycanın payı 51%, şirkətin payı isə 49%-dir.

N.Təbrizli