İnformasiya texnologiyaları sahəsində qadınların iştirakı dəfələrlə artıb - Nazir müavini

Azərbaycanda kompüter elmləri və informasiya təhlükəsizliyi sahəsində qadınların iştirakı son illərdə əhəmiyyətli dərəcədə artıb. Bu barədə rəqəmsal inkişaf və nəqliyyat nazirinin müavini Samir Məmmədov “İKT-də Qadınlar” təşəbbüsü çərçivəsində keçirilən “Rəqəmsal Sahibkarlıq” müsabiqəsinin mükafatlandırma mərasimində bildirib.

“Xüsusilə informasiya təhlükəsizliyi sahəsində qadınların fəallığı nəzərəçarpacaq dərəcədə artıb. Nazirlik olaraq bu sahəni qadınlar üçün daha əlçatan etmək məqsədilə müxtəlif təşəbbüsləri dəstəkləyirik”, – Məmmədov qeyd edib.

Nazir müavininin sözlərinə görə, finala çıxmış 11 komandaya layihələrinin icrasında zəruri dəstək veriləcək.

O vurğulayıb ki, rəqəmsal iqtisadiyyatda qadınların iştirakının artırılması əmək bazarında gender balansını və rəqabət qabiliyyətini gücləndirir.

Məmmədov əlavə edib ki, Azərbaycanın innovasiya qabiliyyəti sabit səviyyədə saxlanılır.

 “113 ölkə arasında hazırda 57-ci yerdəyik. Biz qadınlarımızın İKT və innovasiya sahəsində fəal iştirakını təşviq etməliyik", - nazir müavini deyib. 

Aytac Zeynalova