Bu gündən etibarən Azərbaycan qazı Suriyaya nəql ediləcək. Bununla da Suriya Azərbaycan qazını istehlak edən 13-cü ölkə olacaq. Hazırda Azərbaycan qazı 12 ölkəyə ixrac olunur. Bu barədə deputat Vüqar Bayramov öz sosial hesabında yazıb.
Qaz nəqli Türkiyənin Kilis vilayətindən Suriyanın Hələb şəhərinə çəkilmiş, gündəlik 6 milyon kubmetr ötürmə qabiliyyətinə malik Kilis–Hələb kəməri vasitəsilə həyata keçiriləcək. Bu, illik təqribən 2 milyard kubmetr ötürmə potensialı deməkdir.
Azərbaycan qazı Hələbdə elektrik enerjisi istehsalı üçün istifadə olunacaq və təxminən 1 200 meqavat əlavə güc yaradılması planlaşdırılır. Bu da Suriyanın daxili enerji təminatını iki dəfə yaxşılaşdırmaq potensialına malikdir.
Ekspertlər bu addımın Azərbaycanın Yaxın Şərqdə artan enerji rolunu gücləndirəcəyini bildirirlər. Hazırda Azərbaycan təkcə region və Avropa üçün deyil, həm də Yaxın Şərq üçün enerji təhlükəsizliyində mühüm tərəfdaş kimi çıxış edir.
Suriyaya qaz tədarükü Azərbaycanın təşəbbüskarı olduğu Cənub Qaz Dəhlizi çərçivəsində genişlənən ixrac strategiyasının bir hissəsi kimi qiymətləndirilir. Layihənin reallaşması Azərbaycanın siyasi dəstəyi və regional əməkdaşlıq nəticəsində mümkün olub.
Azərbaycan rəsmiləri Suriyaya qaz nəqlini “tarixi hadisə” kimi qiymətləndirir, çünki bu addım uzun müddət münaqişədən zərər çəkmiş ölkənin enerji sabitliyinə töhfə verəcək.
Foto 
Video 
