Avropada qaz qiymətləri Tramp–Putin sammiti ərəfəsində kəskin ucuzlaşıb

 ABŞ prezidenti Donald Tramp və Rusiya prezidenti Vladimir Putinin Alyaskada keçirəcəyi sammit ərəfəsində Avropada təbii qazın qiymətləri 2025-ci ilin ən aşağı səviyyəsinə enib.

 “Bloomberg” verdiyi məlumata görə, Amsterdam ICE birjasında qaz fyuçersləri avqustun əvvəlindən bəri təxminən 10% ucuzlaşaraq may ayından bu yana minimuma düşüb.

Ekspertlər bildirirlər ki, treyderlər Rusiya qazının Avropaya geri dönüşünü hələ də az ehtimallı hesab edirlər – hətta Ukraynada atəşkəs əldə olunsa belə.

Lakin Moskva ilə Vaşinqton arasında enerji sanksiyalarına dair mümkün razılaşmalar qlobal təchizat bazarına ciddi təsir göstərə bilər.

Hazırda Avropa əsasən ABŞ və Qətər kimi ölkələrdən mayeləşdirilmiş təbii qaz idxal edir.

N.Təbrizli