Tullantı sularını düzgün idarə etməyənlərə 1000 manatadək cərimə tətbiq edilə bilər

Kanalizasiya sistemi olmayan ərazilərdə tullantı sularını qanunsuz şəkildə ətraf mühitə axıdan fiziki şəxslər 600–1000 manat məbləğində cərimələnə bilər. Bu barədə Suların İstifadəsinə və Mühafizəsinə  Dövlət Nəzarəti Xidməti (SİMDNX) məlumat yayıb. 

Qeyd olunur ki, bu hallar xüsusilə Bakıətrafı ərazilərdə artan məskunlaşma fonunda müşahidə olunur. Qanunvericiliyə əsasən, mərkəzləşdirilmiş kanalizasiya sistemi olmayan sahələrdə sukeçirməz və təhlükəsiz çirkab su quyuları yaradılmalı və mütəmadi təmizlənməlidir.

Qurğu və tədbirlər “Su təchizatı və tullantı suları haqqında” Qanun və aidiyyəti qaydalar çərçivəsində həyata keçirilməlidir.

Xidmət vətəndaşları tullantı sularının düzgün idarə edilməsinin ətraf mühitin və ictimai sağlamlığın qorunması baxımından vacibliyinə diqqət yetirməyə çağırıb.