Deputat: ABŞ-ın Zəngəzur dəhlizi ilə bağlı öhdəliyi Azərbaycanın diplomatik uğurudur

Milli Məclisin deputatı Qüdrət Həsənquliyev Prezident İlham Əliyevin ABŞ-a səfərini “böyük siyasi hadisə” kimi qiymətləndirib. Bu barədə o, “Vaşinqton razılaşmaları: sülh diplomatiyasının və müdrik liderliyin təntənəsi” mövzusuna həsr olunmuş xüsusi iclasda çıxışı zamanı bildirib.

Deputat qeyd edib ki, ABŞ-ın Zəngəzur dəhlizi ilə bağlı öhdəlik götürməsi Azərbaycanın mühüm diplomatik uğuru kimi qiymətləndirilməlidir.

Həsənquliyev Azərbaycan və Ermənistan arasında davam edən sülh prosesinin Milli Məclisin payız sessiyasının gündəliyinə daxil edilməsini təklif edib.

O bildirib ki, Zəngəzur dəhlizinin açılması beynəlxalq yükdaşımalar sisteminə töhfə verə və region dövlətləri üçün yeni imkanlar yarada bilər.

Deputat həmçinin vurğulayıb ki, Azərbaycanın əldə etdiyi uğurlarda Prezident İlham Əliyevin rolu mühümdür

 “Erməni xalqını üçüncü qüvvələrin təsirindən İlham Əliyev xilas edib,” –  Həsənquliyev bildirib.

O, Vaşinqtonda əldə olunan razılaşmaların Rusiyanı da qane edəcəyinə ümid etdiyini, Türkiyə və Rusiya kimi regional güclərin sülh prosesində iştirakını zəruri hesab etdiyini bildirib.

Deputat əlavə edib ki, Azərbaycanın gələcək inkişafı üçün investisiya mühiti yaxşılaşdırılmalı, beynəlxalq iqtisadi təşkilatlarla əməkdaşlıq genişləndirilməli və üzvlük prosesləri sürətləndirilməlidir.

Gülnar Nazimqızı