ATƏT Minsk qrupunun ləğvi prosesi başlayıb

Avropada Təhlükəsizlik və Əməkdaşlıq Təşkilatı (ATƏT) Azərbaycan və Ermənistanın birgə müraciətinə əsasən, Minsk qrupunun və ona bağlı təsisatların ləğvi prosesinə başlayıb. Bu barədə report ATƏT-də Finlandiyanın sədrliyi çərçivəsində yaradılmış işçi qrupunun rəhbərinin müavini Toni Sandellə istinadla yazıb.

Sandell bildirib ki, təşkilatın Katibliyi 1 sentyabr tarixli Daimi Şura qərarının icrasına dair praktiki addımlar atır. Onun sözlərinə görə, bu mərhələdə əsas diqqət kadr məsələləri, arxiv materiallarının idarə olunması, idarəetmə strukturlarının bağlanması və əmlakın ötürülməsi kimi texniki məsələlərə yönəlib.

“Minsk prosesinin və əlaqəli qurumların fəaliyyətinin dayandırılması istiqamətində işlər aparılır. Bura ATƏT sədrinin şəxsi nümayəndəsinin ofisi, yüksək səviyyəli planlaşdırma qrupu və sənədlərlə iş daxildir”, – Sandell deyib.

Tərəflərin razılığına əsasən, ləğv prosesi 2025-ci il dekabrın 1-dək tamamlanmalıdır.

Minsk qrupu 1992-ci ildə ATƏT (o zamankı ATƏM) tərəfindən Azərbaycan və Ermənistan arasında münaqişənin sülh yolu ilə həllinə dəstək məqsədilə yaradılmışdı. 1994-cü ildən etibarən qrupun həmsədrləri Rusiya, ABŞ və Fransa olub.

Qrup, təxminən 30 il ərzində danışıqların əsas beynəlxalq platforması kimi fəaliyyət göstərsə də, 2020-ci ildə Azərbaycanın Qarabağda keçirdiyi 44 günlük müharibə nəticəsində real təsir gücünü itirib. 2023-cü ilin sentyabrında isə Azərbaycan ərazisindəki separatçı rejimin ləğvi ilə münaqişə tam başa çatıb.

Azərbaycan Minsk qrupunun fəaliyyətsiz olduğunu əsas gətirərək, qurumun ləğvini tələb etmişdi. Bu ilin avqustunda Vaşinqtonda Azərbaycan və Ermənistan xarici işlər nazirləri tərəfindən Minsk prosesinin rəsmi şəkildə bağlanmasına dair birgə sənəd imzalanıb.