BTC ilə 3,38 milyon ton qazax nefti nəql olunub

Energetika naziri Pərviz Şahbazov Astanada keçirilən “Qazaxıstan Enerji Həftəsi” çərçivəsində Qazaxıstanın nəqliyyat naziri Nurlan Sauranbayev, energetika naziri Erlan Akkenjenov və Beynəlxalq Bərpa Olunan Enerji Agentliyinin (IRENA) baş direktoru Françesko La Kamera ilə görüşlər keçirib.

Sauranbayevlə görüşdə ikitərəfli ticarət dövriyyəsinin 2025-ci ilin ilk yarısında 4,2 dəfə artaraq 500 milyon dollara çatdığı vurğulanıb, Orta Dəhliz və Zəngəzur dəhlizi üzrə nəqliyyat əlaqələrinin genişləndirilməsi müzakirə olunub.

Akkenjenovla danışıqlarda 2023-cü ildən BTC kəməri ilə 3,383 milyon ton qazax neftinin nəql olunduğu qeyd edilib, tranzitin artırılması, SOCAR–KazMunayGaz əməkdaşlığı və “Mərkəzi Asiya–Azərbaycan Yaşıl Enerji Dəhlizi” layihəsi ətrafında fikir mübadiləsi aparılıb. Layihənin texniki-iqtisadi əsaslandırması üçün məsləhətçi şirkətin noyabrda müəyyənləşəcəyi bildirilib.

La Kamera ilə görüşdə isə Azərbaycanın bərpa olunan enerji sahəsində təşəbbüsləri və IRENA ilə əməkdaşlıq imkanları nəzərdən keçirilib.

N.Təbrizli