“Sevilya” “Barselona”nı darmadağın edib

İspaniya La Liqasının 8-ci turunda “Sevilya” doğma meydanda “Barselona” üzərində inamlı qələbə qazanıb – 4:1.

Oyun “Ramon Sançes Pisxuan” stadionunda keçirilib. 13-cü dəqiqədə Aleksis Sançes penaltidən hesabı açıb, 37-ci dəqiqədə İsaak Romero fərqi iki topa çatdırıb.

“Barselona”nın hücumçusu Markus Reşford fasiləyə az qalmış bir qolla hesabı azaltsa da, ikinci hissədə “Sevilya” üstünlüyünü qoruyub. Robert Levandovski 74-cü dəqiqədə penaltidən yararlana bilməyib.

Matçın son dəqiqələrində Xose Anxel Karmona (90-cı dəqiqə) və Akor Adams (90+6) komandalarına daha iki qol qazandıraraq yekun nəticəni müəyyənləşdiriblər.

Bu qələbə ilə “Sevilya” turnir cədvəlində altıncı pilləyə yüksəlib, “Barselona” isə liderdən dörd xal geridə qalaraq dördüncü yerdədir.

N.Təbrizli