Fərdi məlumatların istifadəsi ilə bağlı yeni qanun layihəsi hazırlanır - Nazirlik rəsmisi

Azərbaycanda fərdi məlumatların istifadəsi ilə bağlı yeni qanun layihəsi hazırlanır. Sənədin məqsədi artan rəqəmsal təhdidlər fonunda kibertəhlükəsizliyi gücləndirmək və müasir çağırışlara cavab verməkdir. Bunu  Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin rəisi Fərid Zeynalov deyib.

Onun sözlərinə görə, hər bir şəhərdə insanların evlərində internetə qoşulu çoxsaylı cihazlar var və bu, kütləvi şəkildə kibertəhlükəsizlik risklərini artırır.

“Bu cihazlar üzərindən həm şəxsiyyət, həm də biometrik məlumatlar toplanır. Bu da öz növbəsində genişmiqyaslı kibertəhlükə yaradır,” – Zeynalov Bakıda keçirilən “Critical Infrastructure Defence Challenge 2025” (CIDC-2025) tədbirində bildirib.

O əlavə edib ki, hazırlanmaqda olan yeni qanun layihəsinin məqsədi fərdi məlumatların qorunması sahəsində hüquqi çərçivəni müasirləşdirmək və vətəndaşların rəqəmsal təhlükəsizliyini təmin etməkdir.

Gülnar Nazimqızı