Aİ Rusiyadan qaz idxalına mərhələli qadağa tətbiq edir

Avropa İttifaqı (Aİ) Rusiyadan təbii qaz idxalına mərhələli qadağa tətbiq etmək qərarına gəlib. Qərar Aİ Şurası tərəfindən Macarıstan və Slovakiyanın vetosundan yan keçərək qəbul olunub.

Yeni sənədə əsasən, Rusiya mənşəli boru kəməri qazı və mayeləşdirilmiş təbii qazın (LNG) idxalı 2028-ci il yanvarın 1-dən etibarən tamamilə qadağan ediləcək.

Qadağa mərhələli şəkildə tətbiq olunacaq.  Belə ki, 2026-cı il yanvarın 1-dən yeni müqavilələrin bağlanması qadağan ediləcək.

17 iyun 2025-dək bağlanmış qısamüddətli müqavilələr 2026-cı ilin eyni tarixinədək qüvvədə qala bilər.

Uzunmüddətli müqavilələr üçün son tarix isə 2028-ci il yanvarın 1-i olaraq müəyyənləşdirilib.

Qərar, Rusiyanın enerji resurslarından siyasi təsir aləti kimi istifadə etməsinin qarşısını almaq məqsədi daşıyır. Aİ 2022-ci ildən bəri Rusiya qazına olan asılılığını azaltmaq istiqamətində addımlar atır və alternativ enerji mənbələrinin diversifikasiyasını sürətləndirib.

Macarıstan və Slovakiya əvvəllər qadağalara qarşı çıxaraq enerji təhlükəsizliyi və iqtisadi zərbələr səbəbilə istisnalar tələb edirdilər. Yeni qərar onların narahatlıqlarını nəzərə alaraq müvəqqəti keçid dövrləri təklif edir.

Aytac