ABŞ silah istehsalında Çindən xeyli irəlidədir - Tramp

Birləşmiş Ştatlar hərbi güc baxımından Çinlə müqayisədə “xeyli irəlidədir” və ölkənin arsenalında ictimaiyyətə məlum olmayan qabaqcıl silah sistemləri mövcuddur. Bunu ABŞ prezidenti Donald Tramp bildirib.

Tramp bu bəyanatı Ağ Evdə Avstraliyanın baş naziri Entoni Albanese ilə görüşdən əvvəl jurnalistlərin ABŞ-ın hərbi baxımdan Çindən geri qala biləcəyi ilə bağlı sualına cavab olaraq verib.

“Yanlış qəzetləri oxuyursunuz. Biz hərbi baxımdan Çindən çox irəlidəyik. ABŞ çoxlu gəmilərin inşası istisna olmaqla, hər növ silahda onlardan çox irəlidədir. Və biz bunu etməyə başlayacağıq və biz də yetişəcəyik”, – Tramp bildirib.

Prezident xüsusilə süni intellekt texnologiyalarının müasir dövrdə getdikcə artan əhəmiyyətini vurğulayıb və ABŞ-ın bu sahədə də üstün olduğunu qeyd edib.

“Biz həm nüvə texnologiyası, həm də hərbi imkanlar, o cümlədən bir çox insanın bilmədiyi qabaqcıl silahlara malik olmaq baxımından Çindən xeyli irəlidəyik”, – Tramp əlavə edib.

Vaşinqton və Pekin arasında hərbi texnologiyalar, xüsusilə də süni intellekt, hipersəs raketləri və nüvə imkanları sahəsində rəqabət son illərdə artmaqdadır. ABŞ Müdafiə Nazirliyi (Pentagon) 2024-cü ilin əvvəlində yaydığı hesabatda Çinin 2035-ci ilə qədər 1,500-dən çox nüvə başlığına sahib ola biləcəyini bildirib. ABŞ-ın hazırda təqribən 3,700 nüvə başlığı olduğu təxmin edilir.

Beynəlxalq Strateji Araşdırmalar İnstitutunun (IISS) 2025-ci il hesabatına əsasən, ABŞ Müdafiə Büdcəsi 877 milyard dollar olduğu halda, Çin bu sahəyə təxminən 292 milyard dollar ayırıb — bu da Vaşinqtonun Pekindən təxminən üç dəfə artıq hərbi xərc etdiyini göstərir.

Aytac