Növbəti iki ildə 10 bərpa olunan enerji stansiyasının istismara verilməsi planlaşdırılır

Azərbaycan hökuməti qarşıdakı iki il ərzində ümumi investisiya dəyəri 2,7 milyard ABŞ dolları olan 10 günəş və külək elektrik stansiyasının istismara verilməsini planlaşdırır. Bu, “Azərbaycan Respublikasının 2026-cı il dövlət büdcəsi haqqında” qanun layihəsində öz əksini tapıb.

Layihələr beynəlxalq maliyyə təşkilatlarının iştirakı ilə həyata keçiriləcək və onların nəticəsində ölkədə bərpa olunan enerji mənbələrinin ümumi enerji istehsalında payı 2027-ci ildə 33,7 faiz, 2030-cu ildə 38 faiz, 2035-ci ildə isə 42,5 faiz səviyyəsinə çatdırılacaq.

Bu təşəbbüslər Azərbaycanın enerji sektorunda diversifikasiyanı gücləndirmək və karbon emissiyalarını azaltmaq siyasətinin tərkib hissəsidir.

Azərbaycan son illərdə “yaşıl enerji” keçidini sürətləndirərək Xızı-Abşeron, Cəbrayıl və Naxçıvan kimi bölgələrdə iri həcmli külək və günəş layihələrinə start verib.

Ölkə 2030-cu ilə qədər enerji istehsalında bərpa olunan mənbələrin payını əhəmiyyətli dərəcədə artırmağı və “yaşıl enerji ixracçısı”na çevrilməyi hədəfləyir.

Gülnar Nazimqızı