BMT: Azərbaycanın islahatları göstərir ki, mərhəmət və ədalətlə yönəldilən innovasiya gücə çevrilir

"Süni intellekt insan ehtiyaclarını qabaqcadan müəyyən edə, xidmətləri sürətləndirə və əlçatmaz qruplara çata bilər. Bunu BMT-nin Azərbaycandakı rezident əlaqələndiricisi Vladanka Andreeva “SOCGOV 2025: Süni zəka İnsan və Transformasiya üçün”beynəlxalq konfransda deyib

“Süni intellekt ehtiyacları qabaqlaya, xidmətləri göstərə və bəzən ən uzaqdakı insanlara belə yardım edə bilər. Eyni zamanda bu texnologiya ön cəbhədə çalışan insanlara imkan verir ki, maşınların edə bilmədiyini etsinlər — yəni dinləsinlər, empatiya göstərsinlər və qayğı ilə yanaşsınlar,” – deyə BMT nümayəndəsi qeyd edib.

O, süni intellektin imkanları ilə yanaşı, potensial risklərə qarşı da ayıq olmağın vacibliyini diqqətə çatdırıb.

“Biz ehtiyatlı olmalıyıq. Süni intellekt rəqəmsal uçurumu dərinləşdirməməli, zorakılığa zəmin yaratmamalıdır. Bu texnologiya sosial xidmətlərin gücləndirilməsində, təhsilin fərdiləşdirilməsində və işçilərin müxtəlif əmək imkanları ilə uyğunlaşdırılmasında güclü vasitə ola bilər. Lakin onun uğuru rəqəmsal savadlılıqdan, inklüziv siyasətdən və hər bir fərdin öz gələcəyini formalaşdırmaq imkanından asılı olacaq",- o bildirib.

BMT nümayəndəsi vurğulayıb ki, Azərbaycanın həyata keçirdiyi sosial və rəqəmsal islahatlar, innovasiyanın mərhəmət və ədalət prinsipləri ilə yönləndirildikdə, texnologiyanın insanlıq üçün xeyirli qüvvəyə çevrilə biləcəyini sübut edir.

“Azərbaycanın islahatları göstərir ki, innovasiya mərhəmət və ədalətlə yönəldildikdə, texnologiya insanlıq naminə həqiqi bir gücə çevrilir,” – deyə BMT rəsmisi vurğulayıb.

Aytac Zeynalova