Əliyev Cəbrayıl rayonunun Horovlu kəndinin birinci mərhələsinin açılışında iştirak edib

Azərbaycan Prezidenti İlham Əliyev bu gün Cəbrayıl rayonunun Horovlu kəndinin birinci mərhələsinin açılışında iştirak edib.

Dövlət başçısına Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev tərəfindən kənddə görülən işlər barədə məlumat verilib.

Horovlu kəndi 1993-cü ildə Ermənistan tərəfindən işğal edilmiş, 2020-ci il oktyabrın 4-də Azərbaycan Ordusu tərəfindən azad olunmuşdu. Kəndin təməli 2023-cü ilin mayında Prezident İlham Əliyev tərəfindən qoyulub.

Ümumi sahəsi 248 hektar olan kənddə 334 fərdi ev inşa edilib. Evlər 2–5 otaqlıdır və su, işıq, qaz, Günəş panelləri və yüksək sürətli internet kimi müasir kommunikasiya sistemləri ilə təmin olunub.

Birinci mərhələdə 624 şagird yerlik məktəb, 220 yerlik uşaq bağçası, inzibati bina, tibb məntəqəsi, bazar kompleksi və idman-sağlamlıq mərkəzi tikilib. Kəndin su təminatında mühüm rol oynayan beş tarixi kəhriz – “Əsgər”, “Şığı”, “Orta”, “Gülqasım” və “Xəlifə” bərpa olunub.

Kənddə 4,4 hektarlıq park kompleksi, oyun və idman zonaları, Bayraq meydanı və gəzinti yolları salınıb. Ərazidə 3,1 hektar yaşıllıq zolağı yaradılıb, zeytun, çinar və Eldar şamı ağacları əkilib.

İdarəetmə məqsədilə müasir situasiya mərkəzi qurulub. Mərkəz Coğrafi İnformasiya Sistemi (CİS) texnologiyası əsasında kəndin idarəetməsini, infrastrukturun izlənməsini və üçölçülü (3D) xəritələşdirməni təmin edir.

Prezident İlham Əliyev kənd sakinləri ilə görüşüb, onlara mənzillərin açarlarını təqdim edib.