Təhsil İnstitu riyaziyyat olimpiadasında medal qazanılmaması ilə bağlı məsələyə münasibət bildirib

Beynəlxalq riyaziyyat olimpiadaları ən çətin beynəlxalq yarışlar sırasındadır və ölkə üzrə hər il təxminən 600 şagird bu yarışlarda iştirak edir, onlardan yalnız 50-si medal qazanır. Bu barədə Təhsil İnstitunun direktor müavini  Fuad Qarayev "Təhsil saatı"nda çıxışı zamanı bildirib.

Qarayevin sözlərinə görə, bəzən iştirakçılar cəmi bir bal fərqi ilə mükafatlardan kənarda qalır.

O vurğulayıb ki, olimpiadalar xüsusi hazırlıq tələb edən sahədir və bu yarışlarda nəticənin olmaması ümumi təhsil sisteminin zəifliyini göstərmir.

“Müəllimlərimiz, şagirdlərimiz, valideynlərimiz – hamımız istəyirik ki, yarışlarda edə biləcəyimizin ən yaxşısını göstərək. Amma olimpiada nəticələri təhsilin keyfiyyətinin yeganə göstəricisi deyil,” – Qarayev deyib.

Rəsminin sözlərinə görə, dünyanın ən çox bəyənilən təhsil modeli sayılan Finlandiya 1980-ci ildən olimpiadalarda iştirak etsə də, Azərbaycan medal sayında bu ölkəni geridə qoyub.

“Bu o demək deyil ki, Finlandiya təhsil sistemi zəifdir,” – o əlavə edib.

Qarayev son iki ildə riyaziyyat olimpiadasında nəticələrin əvvəlki illərlə müqayisədə zəif olduğunu etiraf edib, lakin bundan əvvəlki illərdə əldə olunan uğurların kifayət qədər qiymətləndirilmədiyini vurğulayıb.

“Neqativ nəticələr dərhal müzakirə olunur, amma uğurlar zamanı eyni diqqət göstərilmir. Tənqid edənlər bəzən həll yollarını da göstərsələr, bu daha faydalı olar,” – o qeyd edib.

Gülnar Nazimqızı