ABŞ Serbiyadan NIS-dəki “Qazprom” payını alacağını gözləyir — Bloomberg

ABŞ Serbiyanın “Qazprom”u Naftna Industrija Srbije (NIS) şirkətindəki payını satmağa razı salacağını və ya həmin payın milliləşdirilməsini gözləyir. Bu barədə Bloomberg-in ABŞ rəsmilərinə istinadən verdiyi məlumatda bildirilib.  

“Mən nə kommunistəm, nə də faşist”, - məsələyə Serbiya prezidenti Aleksandar Vuçiçin reaksiyası isə belə olub.

NIS Balkanların ən böyük enerji şirkətidir . Bu şirlət  neft və qazın kəşfiyyatı, hasilatı və emalı ilə məşğuldur. Şirkətdə “Qazprom Neft”in payı 44,85%, “Qazprom”un payı 11,3%, Serbiyanın payı isə 29,87%-dir.

Şirkətdə rus payının olması NIS-ə qarşı ABŞ sanksiyalarına səbəb olub. Bu sanksiyalar hələ yanvarda Co Bayden administrasiyası dövründə tətbiq olunub. Lakin Vaşinqton onların qüvvəyə minməsini altı dəfə təxirə salıb.

Oktyabrın 9-da NIS məhdudiyyətlərin artıq qüvvədə olduğunu açıqlayıb.

Vuçiç bildirib ki, NIS-ə qarşı sanksiyalar Serbiya üçün “ağır nəticələr” doğura bilər.

Onun sözlərinə görə, Vaşinqton milliləşdirmə halında sanksiyaları təxirə sala biləcəyini təklif edib, lakin o, bu variantı istisna edib.

Prezident daha əvvəl rus paylarının təxminən 600 milyon avroya geri alınması imkanını nəzərdən keçirdiyini söyləmişdi.

N.Təbrizli