2022–2025-ci illər ərzində ÜDM-in orta illik artımı 3,3% təşkil edəcək

2025-ci ilin gözlənilən göstəriciləri nəzərə alınmaqla, 2022–2025-ci illər ərzində ÜDM-in orta illik artımı 3,3% təşkil edəcək. Bu artım tamamilə qeyri-neft-qaz sektorunun inkişafı hesabına təmin olunacaq. Qeyri-neft ÜDM üzrə orta illik artım 6,1% səviyyəsində proqnozlaşdırılır ki, bu da Milli İnkişaf Strategiyasında nəzərdə tutulmuş hədəfdən yüksəkdir. Bunu iqtisadiyyat naziri Mikayıl Cabbarov bildirib.

Cabbarov qeyd edib ki, son illərdə ölkənin ixrac imkanları da əhəmiyyətli dərəcədə genişlənib. 2025-ci ilin göstəriciləri nəzərə alınmaqla, 2019–2025-ci illər ərzində qeyri-neft-qaz ixracının 2,3 dəfə artması gözlənilir.

Nazir əlavə edib ki, Azərbaycanın strateji valyuta ehtiyatları — ölkənin maliyyə təhlükəsizliyinin əsas dayağı — 2018-ci ilin sonundan 2025-ci ilin 1 oktyabrınadək 1,8 dəfədən çox artaraq 81,5 milyard ABŞ dollarına çatıb. Bu göstərici cari il üzrə gözlənilən ÜDM səviyyəsini üstələyir.

Gülnar Nazimqızı