Minimum əmək haqqı alanlar vergidən azad edilməlidir

Həm dövlət, həm də özəl sektorda minimum əmək haqqı alanlar vergidən azad edilməlidir. Bunu Milli Məclisin deputatı Vüqar Bayramov bildirib.

Onun sözlərinə görə, Vergi Məcəlləsinə təklif olunan dəyişikliklərə əsasən, gələn ildən fiziki şəxslərin gəlir vergisi üzrə güzəşt müddəti başa çatır və 2500 manatadək aylıq əmək haqqı 3 faiz dərəcə ilə vergiyə cəlb olunacaq. 

Onun fikrincə, mərhələli sistemin tətbiqi müsbət hal olsa da, bəzi sektorlar üzrə mövcud dərəcələr ədalətli deyil.

“Dövlət sektorunda fiziki şəxslərin gəlir vergisi yüksək olaraq qalır. Bu isə bir sıra sahələrdə, o cümlədən səhiyyə müəssisələrində ixtisaslı kadrların özəl sektora üstünlük verməsinə səbəb olur,” – deputat bildirib.

O qeyd edib ki, dövlət sektorunda tətbiq olunan 14 faizlik vergi dərəcəsi uzun illərdir dəyişdirilmir və hazırda 2500 manatlıq hədd real iqtisadi göstəricilərlə uyğun gəlmir.

“Təklif edirəm ki, dövlət sektorunda 14 faiz dərəcə ilə vergiyə cəlb edilən məbləğ 2500 manatdan 4000 manatadək artırılsın,” – Bayramov deyib.

Deputat həmçinin vurğulayıb ki, minimum əmək haqqı alan vətəndaşların maaşları vergidən azad edilməlidir.

“Dövlət sektorunda 200 manatlıq azadolma tətbiq olunur, lakin özəl sektorda bu yoxdur. Əksər ölkələrdə minimum əmək haqqı vergidən azaddır. Hər iki sektorda vergidən azad olunan məbləğ 400 manat müəyyənləşdirilməlidir,” – o qeyd edib.

Bayramov əlavə edib ki, kirayə gəlirlərinin vergisi 14 faizdən 10 faizə endirilməsi müsbət haldır, lakin bu sahədə rəsmiləşməni stimullaşdırmaq üçün dərəcənin 5 faizə endirilməsi məqsədəuyğun olardı.

Deputatın sözlərinə görə, vergi siyasətində aparılan dəyişikliklər yalnız kəmiyyət deyil, keyfiyyət meyarlarına əsaslanmalı və vergi ödəmə mədəniyyətinin formalaşmasına, istehlakın artmasına və real sektorun dəstəklənməsinə yönəlməlidir.

N.Təbrizli