Azərbaycanda ilkin səhiyyə xidmətlərinin inkişafı üçün 1 500 yeni həkimə ehtiyac var — Zaur Əliyev

Azərbaycanda ilkin səhiyyə xidmətlərinin inkişafı hökumətin əsas prioritetlərindən biridir. Bunu İcbari Tibbi Sığorta üzrə Dövlət Agentliyinin rəhbəri Zaur Əliyev parlamentdə çıxışı zamanı bildirib.

Onun sözlərinə görə, ilkin səhiyyə xidmətlərinin gücləndirilməsi həm xəstəxanalara düşən yüklərin azalmasına, həm də xəstəliklərin qarşısının vaxtında alınmasına imkan verəcək.

“Ölkədə təxminən 2 500 tibb müəssisəsi var və onların təxminən 40 faizi yararsız vəziyyətdədir. Ən ciddi problemlər kənd məntəqələrində müşahidə olunur. Həmçinin ən azı 1 500 həkimin işə cəlb olunmasına ehtiyac var ki, kənd yerlərində kadr çatışmazlığı aradan qaldırılsın,” — Əliyev deyib.

Onun sözlərinə görə, məsələ ilə bağlı Səhiyyə Nazirliyi ilə bir neçə görüş keçirilib və “Səyyar Nazir” təşəbbüsü çərçivəsində kadr çatışmazlığının həlli üzrə təkliflər hazırlanır.

O qeyd edib ki, infrastrukturun bərpası sosial-iqtisadi inkişaf strategiyasına daxil edilib və bu istiqamətdə işlər artıq Bərdə rayonundan pilot layihə kimi başlanılıb. 

Rayon üzrə bütün tibb məntəqələrinin ilin sonuna qədər yenidən qurulması planlaşdırılır.

“Martda vəziyyəti təhlil edəcəyik. İnanıram ki, növbəti bir neçə ildə ilkin səhiyyə xidmətlərində görülən tədbirlərin real nəticələrini görəcəyik,” — Zaur Əliyev əlavə edib.

N.Təbrizli