Məktəblərdə kompüter təminatı 6 şagirdə bir kompüter səviyyəsinə düşəcək — Əmrullayev

Azərbaycanda məktəblərin kompüterləşmə səviyyəsi son illərdə əhəmiyyətli dərəcədə yaxşılaşıb və rəqəmsal təchizat genişləndirilir. Bunu təhsil naziri Emin Əmrullayev parlamentdə 2026-cı ilin büdcə müzakirələri zamanı bildirib.

Nazir qeyd edib ki, 2020-ci ildə hər 36 şagirdə bir kompüter düşürdüsə, görülən tədbirlər nəticəsində bu rəqəm 2026-cı ildə 6 şagirdə bir kompüter səviyyəsinə endiriləcək.

“Bu, təhsil sistemimiz üçün çox ciddi dəyişiklikdir. Artıq məktəblərimizdə kompüter çatışmazlığı problemi əsasən həll olunub və növbəti mərhələ hər şagird üçün fərdi cihaz təminatına doğru addım atmaqdır,” — Əmrullayev deyib.

Onun sözlərinə görə, artıq bəzi məktəblərdə bir şagird – bir cihaz modelinin tətbiqinə başlanılıb və bu proses mərhələli şəkildə genişləndiriləcək. 

Nazir bildirib ki, 2030-cu ilə qədər ölkədə bütün məktəblərdə şagirdlərin rəqəmsal təchizat səviyyəsi tam standartlaşdırılacaq.

Əmrullayev həmçinin qeyd edib ki, təhsil sisteminin informasiya texnologiyaları ilə təminatı üzrə geniş proqramlar icra olunur və məktəblərdə interaktiv tədris mühitinin yaradılması üçün əlavə investisiyalar davam edəcək.

N.Təbrizli