Kiberpolis azyaşlılara aid pornoqrafik videolar satan şəxsləri saxlayıb

Daxili İşlər Nazirliyinin (DİN) Kibercinayətkarlıqla Mübarizə Baş İdarəsinin əməkdaşları “Telegram” sosial şəbəkəsində azyaşlılara məxsus pornoqrafik məzmunlu videoların paylaşılması və onlayn satışı ilə məşğul olan şəxslərə qarşı əməliyyat keçirib.

Nazirlikdən verilən məlumata görə, əməliyyat zamanı həmin kanalların adminləri – şərti adları Arif Muradov və Fərid Süleymanov olan iki nəfər saxlanılıb.

Araşdırma nəticəsində müəyyən edilib ki, saxlanılan şəxslər “Telegram”da yaratdıqları kanallar vasitəsilə azyaşlıların iştirakı ilə çəkilmiş videomaterialların paylaşılmasını və pulla satışını təşkil ediblər. Onlar bu məqsədlə müxtəlif şəxslərin adına olan bank kartlarından istifadə edərək gəlirləri nağdlaşdırıblar.

Faktlarla bağlı araşdırma aparılır. Nazirlik xəbərdarlıq edib ki, azyaşlıların iştirakı ilə çəkilmiş və ictimai əxlaqa zidd videomaterialların paylaşılması və satışı cinayət məsuliyyəti yaradır. Bu cür halların qarşısının alınması istiqamətində əməliyyat tədbirləri davam etdirilir.