Struktur dəyişikliyi “Aztelekom”da kadr ixtisarlarına səbəb olub

“Aztelekom” MMC-də işçi sayının optimallaşdırılması ilə bağlı tədbirlər zərurət yarandıqca həyata keçirilir. Şirkət bunu Apa-ya açıqlamasında bildirib. 

Məlumata görə, 2025-ci ilin əvvəlində “Onlayn Azərbaycan” layihəsinin başa çatması, eləcə də yeni texnologiyaların tətbiqi nəticəsində bəzi avadanlıqlar və funksiyaların aktuallığını itirməsi təşkilati strukturda dəyişiklik ehtiyacını artırıb.

Şirkət son illərdə genişmiqyaslı birləşmələrdən sonra yenidən təşkil olunub. “Aztelekom” MMC-yə “Bakı Telefon Rabitəsi” MMC, “AzEvroTel” MMC, Beynəlxalq Avtomat Telefon Stansiyası, Gəncə və Sumqayıt telekommunikasiya qurumları, həmçinin “Azərrabitəlayihə” MMC qoşulub.

Şirkət bildirir ki, yenidən təşkil və layihələrin tamamlanması fonunda biznes proseslərinin optimallaşdırılması, xərclərin idarə olunması və işçi sayının tənzimlənməsi qanunvericiliyə uyğun şəkildə aparılır.

Redaksiyaya “Aztelekom”da kadr ixtisarlarının həyata keçirildiyi barədə məlumatlar daxil olub.