ABŞ Ukraynadan “sülh planını” 27 noyabra qədər imzalamasını istəyib

ABŞ administrasiyası Kiyevdən Vaşinqtonun təklif etdiyi 28 maddəlik “sülh planı”nı Şükran Günü, yəni noyabrın 27-ə kimi imzalamağı tələb edir. Bu barədə Financial Times Ukrayna rəsmilərinə istinadən yazıb. 

Məlumata görə, Ukraynaya razılaşmanı tezliklə qəbul etməsi üçün “çox güclü təzyiq” göstərilir.

FT-nin həmsöhbətləri vəziyyəti 2025-ci ilin yazında faydalı qazıntıların hasilatı üzrə hüquqlar haqqında sazişin imzalanması öncəsi göstərilən təzyiqlə müqayisə ediblər.

Qəzet yazır ki, “sülh planı” Kiyevdən bir sıra ciddi güzəştlər tələb edir və Ukraynanın uzunmüddətli “qırmızı xətlərini” pozur.

Ukrayna rəsmilərinin sözlərinə görə, Tramp administrasiyası Kiyevə müharibəni bu ilin sonuna qədər yekunlaşdırmaq üçün “aqressiv rejimdə” çalışdığını bildirib. Vaşinqton Zelenskinin planı gələn həftə cümə axşamına – Şükran Gününədək imzalayacağını gözləyir və ayın sonunda Moskva ilə razılaşma əldə etməyi hədəfləyir.

Lakin Kiyev bildirir ki, planın bir neçə bəndi Ukrayna üçün “qırmızı xəttdir” və bu müddətə əməl etmək real görünmür. Ukrayna tərəfi ABŞ-a qarşı təkliflər üzərində işləyir.

Prezident Vladimir Zelenski bildirib ki, Ukrayna sülh prosesini pozmaq niyyətində deyil. Axşam müraciətində o, ABŞ nümayəndələri ilə danışıqlarda Vaşinqtonun müharibəni dayandırmaq üçün təqdim etdiyi təklifləri müzakirə etdiyini deyib.

Zelenski yaxın günlərdə ABŞ Prezidenti Donald Trampla danışacağını bildirib: “ABŞ-ın gücü sülhü yaxınlaşdırmağa qadirdir və biz bunu itirmək istəmirik. Biz anlayırıq ki, Rusiyanın real sülh istəyi yoxdur”.

Ukrayna lideri həmçinin vurğulayıb ki, “ABŞ Rusiyanı müharibəni bitirməyə ciddi şəkildə məcbur edə bilər”.

20 noyabrda Zelenski ABŞ ordusu naziri Daniel Driskoll ilə görüşdə müharibənin dayandırılması üzrə variantları müzakirə edib. Daha sonra Ukrayna KİV-i 28 maddədən ibarət “sülh planı”nın detallarını dərc edib.

N.Təbrizli