Azərbaycanda pasport və sürücülük vəsiqəsi üçün müraciətlər onlaynlaşdırıla bilər

Azərbaycanda vətəndaşların dövlət xidmətlərinə çıxışının asanlaşdırılması məqsədilə şəxsiyyət vəsiqələrinin, ümumvətəndaş pasportlarının və sürücülük vəsiqələrinin alınması və yenilənməsi prosesində mühüm dəyişikliklər təklif olunur. Daxili İşlər Nazirliyinin (DİN) məlumatına görə, bu xidmətlər üzrə ilkin müraciət mərhələsinin rəqəmsallaşdırılması nəzərdə tutulur.

Təkliflər qəbul edilərsə, vətəndaşlar həmçinin nəqliyyat vasitələrinin qeydiyyatı üçün ilkin sənədləri dövlət qurumlarına fiziki olaraq getmədən, onlayn qaydada təqdim edə biləcəklər.

DİN bildirir ki, təşəbbüs dövlət xidmətlərinin keyfiyyətinin və əlçatanlığının artırılmasına, vətəndaş məmnunluğunun yüksəldilməsinə və ölkədə rəqəmsal transformasiya prosesinin sürətlənməsinə xidmət edir. Eyni zamanda, bu addımlar “rəqəmsal hökumət” modelinin gücləndirilməsi və BMT-nin Dayanıqlı İnkişaf Məqsədlərinə töhfə baxımından əhəmiyyətli sayılır.

Hazırda təkliflərin icra mexanizmləri və mərhələləri üzrə müvafiq qiymətləndirmə aparılır.