Deputat jurnalistlərin amnistiya aktı ilə azadlığa çıxmasını istəyir - Video

Həbsdə olan jurnalistlərin də amnistiya aktı çərçivəsində azadlığa buraxılması məqsədəuyğun olar. Bunu Milli Məclisin deputatı Aqil Abbas dekabrın 16-da parlamentin plenar iclasında çıxışı zamanı danışıb.

Abbas qeyd edib ki, Prezidentin amnistiya təşəbbüsü minlərlə ailəyə sevinc gətirəcək və mühüm humanist addımdır.

“Arzu edirəm ki, amnistiya aktı jurnalistlərə də şamil olunsun. Düzdür, günahları var, amma düşünürəm ki, onları da bağışlamaq olar”, – deputat deyib.

Dekabrın 15-də Prezident İlham Əliyev humanizm və mərhəmət prinsiplərini əsas götürərək Azərbaycanda 20 mindən çox şəxslə bağlı amnistiya elan edilməsi təşəbbüsü irəli sürüb.

Proqnozlara görə, amnistiya çərçivəsində 5 mindən çox məhkum azadlıqdan məhrumetmə cəzasından azad ediləcək, 3 mindən artıq şəxsin cəzası azaldılacaq, 7 mindən çox məhkum azadlığın məhdudlaşdırılması cəzasından, 4 minə yaxın şəxs azadlıqdan məhrumetmə ilə bağlı olmayan və ya şərti cəzalardan azad olunacaq. Bundan əlavə, mindən çox şəxs cinayət məsuliyyətindən azad edilə bilər.

Gülnar Nazimqızı