Dünyada ən azı 46 ölkə elektron siqaretdən imtina edib

Dünyada azı 46 ölkə elektron siqaretləri qadağan edib. Bunu Milli Məclisin deputatı Vüqar İsgəndərov deyib. 

Onun sözlərinə görə, bəzi dövlətlər bu məhsulları tamamilə yasaqlayıb, digərləri isə yaş məhdudiyyəti tətbiq edib.

İsgəndərov qeyd edib ki, elektron siqaretlərin qadağan edilməsi Avropada nisbətən az, Latın Amerikası ölkələrində isə daha geniş yayılıb. O, bunu həmin regionlarda elektron siqaretlərdən zəhərlənmə və ölüm hallarının statistik olaraq daha çox qeydə alınması ilə əlaqələndirib.

Deputat Azər Badamov isə bildirib ki, Qazaxıstan və Qırğızıstanda elektron siqaretlərlə bağlı artıq məhdudiyyətlər tətbiq olunur. Onun sözlərinə görə, pis vərdişlərə qarşı vaxtında müdaxilə vacibdir, çünki elektron siqaretə alışan şəxslər sonradan digər zərərli vərdişlərə də meyil göstərə bilirlər.

Badamov vurğulayıb ki, maarifləndirmə tədbirləri genişləndirilməli, xüsusilə məktəblərdə və müxtəlif kollektivlərdə elektron siqaretlərə qarşı təbliğat işi aparılmalıdır. Deputatın fikrincə, profilaktik tədbirlər gənclərin sağlamlığının qorunmasında əsas rol oynaya bilər.

Gülnar Nazimqızı