Böyüklərlə müqayisədə yeniyetmələr 9 dəfə çox elektron siqaretdən istifadə edir - AQTA

Ümumdünya Səhiyyə Təşkilatı (ÜST) elektron siqaretlərin yayılması ilə bağlı 2025-ci ildə ilk dəfə ciddi həyəcan siqnalı verib. Bunu Qida Təhlükəsizliyi Agentliyinin Qida təhlükəsizliyi şöbəsinin müdiri Validə Sadıxova bildirib.

Sadıxovanın sözlərinə görə, son illər dünyada klassik tütün məhsullarından istifadə təxminən 30% azalıb, lakin bu azalma elektron siqaretlərə marağın kəskin artması ilə əvəzlənib. Hazırda dünyada 100 milyondan çox insan elektron siqaretdən istifadə edir.

Rəsmi məlumatlara əsasən, istifadəçilərin təxminən 15 milyonu 14–18 yaş arası yeniyetmələrdir. Statistik göstəricilər yeniyetmələrin elektron siqaretdən böyüklərlə müqayisədə 9 dəfə daha çox istifadə etdiyini göstərir.

Sadıxova qeyd edib ki, üzərində cizgi film personajları olan və meyvə dadlı elektron siqaretlər gənclər üçün xüsusi olaraq cəlbedici formada təqdim edilir, bu da onların istifadəyə marağını artırır. Risklərin əvvəlcədən proqnozlaşdırıldığını deyən şöbə müdiri vurğulayıb ki, bir sıra beynəlxalq bloqerlər tərəfindən bu məhsulların təşviqi aparılır, halbuki elektron siqaretlərin uzunmüddətli sağlamlıq riskləri hələ də tam araşdırılmayıb.

Onun sözlərinə görə, elektron siqaretlərin tərkibində nikotinin miqdarı çox vaxt adi tütün məmulatlarından daha yüksək olur. Bu tendensiya fonunda son 6 ay ərzində 11 ölkə elektron siqaretlərdən imtina edib və ya ciddi məhdudiyyətlər tətbiq edib.

Gülnar Nazimqızı