Polis Akademiyası 525 kursant qəbulu elan edib

Daxili İşlər Nazirliyi Polis Akademiyasına əyani təhsil üzrə qəbul üçün müsabiqə elan edib.

Nazirliyin məlumatına görə, III qrupdan “Hüquqşünaslıq” ixtisası üzrə 500, I qrupdan “İnformasiya təhlükəsizliyi” ixtisası üzrə isə 25 kursant qəbul olunacaq.

Müsabiqədə Azərbaycan dilini sərbəst bilən, boyu 165 sm-dən az olmayan, yaşı 16–18 arasında olan, 11-ci sinif şagirdləri və ya tam orta təhsilli, hərbi xidmətə yararlı Azərbaycan vətəndaşları iştirak edə bilərlər. Sənədlərin qəbulu namizədlərin daimi yaşadığı yer üzrə polis orqanlarında aparılır və 2026-cı il fevralın 22-dək davam edəcək.

Qəbul imtahanları Azərbaycan və rus dillərində keçiriləcək. Təhsil müddəti 4 ildir. Kursantlar dövlət hesabına yataqxana, xüsusi geyim forması, təqaüd və yeməklə təmin olunacaqlar. Məzunlara polis leytenantı xüsusi rütbəsi verilərək daxili işlər orqanlarında xidmətə təyin ediləcəklər.