Qida Təhlükəsizliyi Agentliyi uşaqlar üçün Yeni il hədiyyə qutularına diqqət olunmasını tövsiyə edir

Uşaqlar üçün şirniyyatla dolu Yeni il hədiyyə qutuları yalnız mağazalar, yarmarkalar və digər rəsmi satış yerlərindən alınmalıdır.

Qida Təhlükəsizliyi Agentliyi xəbərdarlıq edir ki, bəzi hallarda qutunun üzərində göstərilən tarix məhsulların deyil, qablaşdırmanın istehsal tarixini göstərir.

Agentlik istehlakçılara qutudakı məhsulların etiket məlumatlarına diqqət yetirməyi tövsiyə edir. Məhsulların üzərində istehsal tarixi, yararlılıq müddəti, adı, əmtəə nişanı, xalis çəkisi, qida dəyərliliyi, eləcə də istehsalçı müəssisənin adı və ünvanı aydın və oxunaqlı şəkildə göstərilməlidir.

Həmçinin, hədiyyə qutularının qablaşdırmasının deformasiyaya uğramaması, əzilməməsi və korlanmaması vacibdir. Xüsusi saxlanma şəraiti tələb edən məhsullar – yoqurtlar, kremli qənnadı məmulatları və kəsmik içlikli məhsullar – bu cür qutulara yerləşdirilməməlidir.

Qida məhsullarının tərkibi, yararlılıq müddəti, saxlanma şəraiti və digər məsələlərlə bağlı şübhələr yaranarsa, istehlakçılar Agentliyin “1003-Çağrı Mərkəzi” ilə əlaqə saxlamalıdır.