Bakıda “Kənddən Şəhərə” Yeni il yarmarkası start götürür

Sabahdan etibarən Kənd Təsərrüfatı Nazirliyinin tabeliyində fəaliyyət göstərən “Aqrar Tədarük və Təchizat” ASC-nin təşkilatçılığı ilə sayca 8-ci “Kənddən Şəhərə” Yeni il yarmarkası fəaliyyətə başlayır. Dünya Azərbaycanlılarının Həmrəyliyi Günü və Yeni il bayramına həsr olunan yarmarka dekabrın 30-dək, 10 gün davam edəcək.

Kənd Təsərrüfatı Nazirliyinin məlumatına görə, yarmarkanın məqsədi kiçik və orta fermer təsərrüfatlarında istehsal olunan məhsulların bazara çıxışını genişləndirmək, fermerlər üçün alternativ satış imkanları yaratmaq və bayram ərəfəsində şəhər sakinlərini yerli, keyfiyyətli və münasib qiymətli məhsullarla təmin etməkdir.

Yarmarkada ölkənin 35 regionundan 80-ə yaxın fermer iştirak edir. Onlar 140-dan artıq məhsul çeşidini birbaşa istehsalçıdan alıcıya təqdim edirlər. Satışa çıxarılan məhsulların keyfiyyətinə Azərbaycan Qida Təhlükəsizliyi Agentliyi nəzarət edir. Vətəndaşlar məhsullarla bağlı şübhə yarandıqda, yarmarkada fəaliyyət göstərən Səyyar Qida Laboratoriyasında analiz etdirə bilərlər.

Nazirlik bildirir ki, fermerlər yarmarkada satış üçün yer, piştaxta, tərəzi və digər zəruri avadanlıqlarla ödənişsiz təmin olunub.

Yarmarka Nərimanov rayonu, Fətəli xan Xoyski küçəsi 5 ünvanında — “Gənclik” metro stansiyasının çıxışında, Atatürk parkının qarşısında təşkil olunub.