Əliyev Həkimləri Təkmilləşdirmə İnstitutunun 90 illiyinə həsr olunan konqresin iştirakçılarına müraciət ünvanlayıb

Azərbaycan Prezidenti İlham Əliyev Əziz Əliyev adına Azərbaycan Dövlət Həkimləri Təkmilləşdirmə İnstitutunun 90 illiyinə həsr olunmuş beynəlxalq elmi-praktiki konqresin iştirakçılarına müraciət göndərib. 

Dövlət başçısı müraciətində bildirib ki, mötəbər beynəlxalq tibb qurumlarını təmsil edən alim və mütəxəssislərin iştirakı ilə keçirilən konqres tibb elmi və səhiyyənin aktual məsələlərinin müzakirəsi baxımından mühüm əhəmiyyət daşıyır. Əliyev beynəlxalq təcrübədən qarşılıqlı faydalanmağa əsaslanan müzakirələrin səmərəli olacağına əminliyini ifadə edib.

Prezident qeyd edib ki, Azərbaycanda səhiyyə sistemi yeni inkişaf mərhələsinə qədəm qoyub, tibb müəssisələri müasir standartlara uyğun yenilənir, elm və təcrübənin vəhdətində aparılan araşdırmalar təşviq olunur. Bu prosesdə Həkimləri Təkmilləşdirmə İnstitutunun xüsusi rolu olduğu vurğulanıb.

İlham Əliyev institutun 90 illik tarixində zəngin elmi-pedaqoji ənənələr formalaşdırdığını, yüksək ixtisaslı kadr hazırlığı və beynəlxalq əlaqələrin genişləndirilməsi istiqamətində nüfuzlu mərkəzə çevrildiyini bildirib.

Prezidentin sözlərinə görə, konqres azərbaycanlı və xarici mütəxəssislər arasında əməkdaşlığın güclənməsinə, tibbi xidmətin keyfiyyətinin yüksəldilməsinə və tibb elminin inkişafına töhfə verəcək.