Avtobusda sürücünün telefonunu götürüb qaçan sərnişin saxlanılıb

Paytaxtın Nəsimi rayonunda soyğunçuluq hadisəsi baş verib.Bu barədə Daxili İşlər Nazirliyi məlumat yayıb.

Bildirilib ki, günorta saatlarında naməlum şəxs sərnişin qismində 54 saylı xətt üzrə hərəkət edən avtobusa daxil olaraq sürücünün mobil telefonunu talayıb.

Polis əməkdaşları tərəfindən keçirilən tədbirlə əməli törətməkdə şübhəli bilinən 31 yaşlı S.Quluzadə müəyyən olunaraq saxlanılıb. Araşdırmalarla həmin şəxsin avtobusa sərnişin qismində daxil olduğu və anidən yanında dayandığı sürücünün mobil telefonunu götürərək qaçdığı məlum olub.

Faktla bağlı araşdırmalar davam etdirilir.