Bakı avtobuslarında NFC, Apple Pay və Google Pay ilə ödəniş tam aktivləşdirildi

Bakı şəhərində nağdsız ödəniş sistemi ilə təchiz olunmuş bütün avtobus marşrutlarında NFC texnologiyasını dəstəkləyən yerli bank kartları, həmçinin Apple Pay və Google Pay vasitəsilə ödəniş mexanizmi aktivləşdirilib. Bu barədə Azərbaycan Yerüstü Nəqliyyat Agentliyi məlumat yayıb.

Qurumun açıqlamasına görə, yeni sistem çərçivəsində sərnişinlər üçün ardıcıl ödəniş imkanları genişləndirilib və əməliyyatların sayı 1-dən 2-yə artırılıb. Bu funksiya NFC layihəsinin ilkin mərhələsində tətbiq olunur və mərhələnin nəticələrinə əsasən gələcəkdə ardıcıl ödəniş limitlərinin artırılması planlaşdırılır.

Yeni mexanizm nağd pulun və fiziki “BakıKart”ın istifadəsinə ehtiyacı aradan qaldırır. Sərnişinlər ödənişləri telefon, ağıllı saat, bank kartı və digər NFC funksiyalı cihazlar vasitəsilə saniyələr ərzində həyata keçirə bilirlər. Ödəniş üçün cihazın validatora yaxınlaşdırılması kifayətdir.

Agentlik bildirir ki, avtobuslarda ödəniş zamanı yalnız NFC dəstəkli yerli bank kartlarından, eləcə də smartfon və fiziki kartlardan istifadə mümkündür.