FHN küləkli hava şəraiti ilə əlaqədar əhaliyə müraciət edib

Fövqəladə Hallar Nazirliyi (FHN) gözlənilən küləkli hava şəraiti ilə əlaqədar əhaliyə müraciət edib.

Bildirilib ki, Milli Hidrometeorologiya Xidmətinin məlumatına əsasən, yaxın günlər ərzində bəzi ərazilərdə güclü külək əsəcəyi proqnozlaşdırılır.Bununla bağlı nazirlik əhaliyə müraciət edərək, müvafiq təhlükəsizlik qaydalarına ciddi əməl etməyə çağırır.

Belə ki, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərinin, hündür ağacların altında dayanmamaq tövsiyə olunur.

FHN həmçinin güclü küləyin baş verən yanğınların söndürülməsində çətinliklər yaratdığını qeyd edərək, yanğın təhlükəsizliyi qaydalarına ciddi əməl etməyin əhəmiyyətini vurğulayıb. Vətəndaşlara təhlükə ilə qarşılaşdıqları halda 112-yə zəng etmələri tövsiyə edilir.