Regional məsələlər komitəsinin 2026-cı ilin yaz sessiyası üçün iş planı təsdiqlənib

Milli Məclisinin Regional məsələlər komitəsinin 2026-cı ilin yaz sessiyası üçün iş planı təsdiq edilib.

Yaz sessiyası dövründə komitə tərəfindən qanun layihələrinin hazırlanması və müzakirəsi, onların icrasına nəzarət, həmçinin komitəyə daxil olan müraciətlərin araşdırılması nəzərdə tutulur.

İş planında Azərbaycan Respublikası Prezidentinin, Milli Məclis deputatlarının, Ali Məhkəmənin, Baş Prokurorluğun və Naxçıvan Muxtar Respublikasının Ali Məclisinin qanunvericilik təşəbbüsü qaydasında təqdim etdiyi qanun layihələrinin komitədə müzakirəsi xüsusi yer tutur.

Sənədə əsasən, komitənin iclaslarında müvafiq dövlət qurumlarının və yerli icra hakimiyyəti orqanlarının nümayəndələrinin iştirakı təmin ediləcək, daxil olan müraciətlər təhlil edilərək qanunvericiliyin tələblərinə uyğun baxılacaq.

Eyni zamanda, komitə üzvlərinin vətəndaş qəbulu və vətəndaşların müraciətlərinə baxılması yaz sessiyası ərzində davam etdiriləcək.

Gülnar Nazimqızı