Kiberpolis qanunsuz onlayn kazinolara zərbə vurdu: iki nəfər saxlanıldı

Kibercinayətkarlıqla Mübarizə Baş İdarəsi (KMBİ) sosial şəbəkələr üzərindən qanunsuz onlayn qumar və kazino şəbəkələri quran şəxslərə qarşı əməliyyatları sərtləşdirib. Daxili İşlər Nazirliyinin məlumatına görə, keçirilən növbəti əməliyyat zamanı 35 yaşlı Ülvi Rzayev və 26 yaşlı Rza Rzayev saxlanılıb.

İstintaq müəyyən edib ki, saxlanılan şəxslər xaricdən idarə olunan qeyri-qanuni qumar saytları ilə birbaşa cinayət əlaqəsinə girərək virtual kassalar yaradıb, “Tokio”, “Lasvegas”, “Tac”, “Joker” və “Padişah Casino” adları altında saxta profillər vasitəsilə vətəndaşları pul müqabilində qumara cəlb ediblər.

Axtarışlar zamanı paytaxtın müxtəlif ünvanlarında yerləşən mənzillərdən elektron sübutlar, eləcə də qanunsuz maliyyə dövriyyəsində istifadə edilən bank kartları və mobil nömrələr götürülüb. Araşdırma göstərib ki, kartlar ayrı-ayrı şəxslərdən ödəniş qarşılığında toplanaraq qeyri-qanuni pul köçürmələrində istifadə olunub.

Faktla bağlı istintaq davam edir, şəbəkənin digər üzvlərinin müəyyən edilməsi istiqamətində tədbirlər genişləndirilib.

DİN vətəndaşlara qanunsuz mərc və qumar oyunlarından uzaq durmaq barədə bir daha sərt xəbərdarlıq edib: bu fəaliyyətlər kiberdələduzluq riskləri, maliyyə itkiləri və cinayət məsuliyyəti ilə nəticələnir.