Azərbaycanın Serbiyaya qaz ixracı 7 dəfədən çox artıb

 2025-ci ilin yanvar–noyabr aylarında Azərbaycan Serbiyaya 106,4 milyon ABŞ dolları dəyərində 192,6 milyon kubmetr təbii qaz ixrac edib. Bu barədə Dövlət Statistika Komitəsi məlumat yayıb.

Rəsmi statistikaya əsasən, ötən ilin eyni dövrü ilə müqayisədə qaz ixracı pul ifadəsində 7,4 dəfə, həcm baxımından isə 5 dəfə artıb. Belə ki, 2024-cü ilin yanvar–noyabr aylarında Serbiyaya cəmi 38,5 milyon kubmetr qaz satılmış, ixracın dəyəri 14,3 milyon ABŞ dolları təşkil etmişdi.

Ümumilikdə isə Azərbaycan 2025-ci ilin ilk 11 ayında xarici bazarlara 22,804 milyard kubmetr təbii qaz ixrac edib. İxracın ümumi dəyəri 8,117 milyard ABŞ dolları olub ki, bu da illik müqayisədə 513,3 milyon dollar və ya 6,7 faiz artım deməkdir. Həcm baxımından artım 718 milyon kubmetr və ya 3 faiz təşkil edib.

Eyni dövrdə Azərbaycana 252,168 milyon kubmetr təbii qaz idxal olunub. İdxalın dəyəri 39,151 milyon ABŞ dolları olub. Statistikaya görə, idxalın dəyəri 2,1 dəfə artsa da, həcmi 2 dəfə azalıb, bu da qaz ticarətində qiymət amilinin kəskin rol oynadığını göstərir.