FHN kəskin hava şəraiti ilə bağlı əhaliyə təkrar xəbərdarlıq edib

Azərbaycanda, o cümlədən Bakıda və Abşeron yarımadasında soyuq, kəskin və yağıntılı hava şəraiti müşahidə olunduğu üçün Fövqəladə Hallar Nazirliyi (FHN) əhaliyə təkrar müraciət edib.

Nazirlikdən bildirilib ki, soyuq hava səbəbindən qaz və elektrik qızdırıcılarından istifadənin artması fonunda yanğın təhlükəsizliyi qaydalarına ciddi əməl olunmalıdır. Nasaz, qeyri-standart və kustar üsulla hazırlanmış qızdırıcılardan istifadə edilməməli, elektrik şəbəkəsi yüklənməməli, işlək vəziyyətdə olan cihazlar nəzarətsiz saxlanılmamalıdır.

FHN xüsusilə dağlıq ərazilərdə yaşayan vətəndaşlara şaxtalı və qarlı havada mümkün qədər yaşayış məntəqələrini tərk etməməyi tövsiyə edib. Zərurət yarandıqda hərəkət istiqaməti barədə yaxınların məlumatlandırılması, avtomobillərin texniki vəziyyətinin mövsümə uyğunluğu və kifayət qədər yanacaq ehtiyatının təmin edilməsi vurğulanıb. Qar uçqunu riski olan ərazilərdən, dik yamaclardan uzaq durmaq və qaranlıq düşmədən geri dönmək tövsiyə olunur.

Güclü külək zamanı yüngül konstruksiyalı tikililərdən, bina və reklam lövhələrindən uzaq durmaq, elektrik dirəkləri, naqillər və hündür ağacların altında dayanmaqdan çəkinmək çağırışı edilib. Küləkli hava şəraitində yanğın təhlükəsizliyi qaydalarına xüsusilə ciddi riayət olunmasının vacibliyi qeyd edilib.

FHN xatırladıb ki, təhlükə zamanı 112 nömrəsinə zəng etmək lazımdır.