Milli Məclisdə idman gününə həsr olunan müzakirə keçiriləcək

Milli Məclisin Gənclər və idman komitəsinin 2026-cı il üçün təsdiqlədiyi tədbirlər planına əsasən, sessiya müddətində və il ərzində gənclər və idman sahəsini əhatə edən bir sıra tədbirlərin keçirilməsi nəzərdə tutulur. Bu barədə komitənin 2026-ci il işlər planında qeyd olunub. 

Gənclər və İdman Nazirliyi, Milli Olimpiya Komitəsi və aidiyyəti federasiyaların birgə iştirakı ilə 5 Mart – Bədən tərbiyəsi və idman gününə həsr olunmuş müzakirə təşkil ediləcək.

Bununla yanaşı, komitə üzvləri və deputatların iştirakı ilə gənclərin ictimai-siyasi həyatda fəal iştirakını təşviq etmək məqsədilə Beyləqan, Nizami, Gəncə-Samux, Goranboy, Zaqatala, Binəqədi, Qaradağ, Şəki, Kəlbəcər, Yasamal, Oğuz, Qəbələ, Tərtər, Ağdərə, Şabran və Xaçmaz rayonlarında gənclərlə görüşlərin keçirilməsi planlaşdırılır.

Tədbirlər planına Təhsil Nazirliyi ilə birgə “Vətənpərvər məktəblilər” layihəsinin icrası, idman federasiyaları ilə ayrı-ayrılıqda görüşlərin təşkili və onların fəaliyyəti ilə yaxından tanışlıq da daxildir.

Eyni zamanda, ümummilli lider Heydər Əliyevin anadan olmasının 103-cü ildönümünə həsr edilmiş “Azərbaycan gəncliyi və Heydər Əliyev” mövzusunda gənclər təşkilatları ilə birgə Milli Məclisdə konfransın keçirilməsi nəzərdə tutulur. Ali təhsil müəssisələrində tələbələrlə görüşlərin təşkili də tədbirlər siyahısında yer alıb.

Gülnar Nazimqızı